ЖИЖИГ, ДУНД ҮЙЛДВЭРИЙГ ХӨГЖҮҮЛЭХ САНД ИРҮҮЛСЭН ТӨСЛИЙГ СОНГОН ШАЛГАРУУЛАХ АЙМГИЙН ДЭД ХОРОО ХУРАЛДЛАА
Монгол Улсын Засгийн газрын 2020 оны 113 дугаар тогтоолоор батлагдсан "Жижиг, дунд үйлдвэрийг хөгжүүлэх сангаас хөнгөлөлттэй зээл олгох, сонгон шалгаруулах, дамжуулан зээлдүүлэх, эргэн төлүүлэх, хяналт тавих журам"-д зааснаар улсын хэмжээнд төсөл хүлээн авах зарыг нэгэн зэрэг мэдэгдэж, 2022 оны 06 дугаар сарын 07-оос 07 дугаар сарын 06-ны хооронд цахимаар хүлээн авсан.
Дорноговь аймгийн хувьд цахимаар 4 сумын 13 аж ахуйн нэгж, байгууллагаас /Сүү, сүүн бүтээгдэхүүний чиглэлээр-3, Эрчимжүүлсэн Мал аж ахуй чиглэлээр-3, Хүлэмжийн аж ахуйн чиглэлээр-2, Хүнсний ногоо зоорь, агуулах-2, Оёмол бүтээгдэхүүн үйлдвэрлэлээр -3/ нийт 5 салбарт 1,471,0 сая.төгрөгийн зээл хүссэн төсөл илгээгджээ.
Дээрх журмын дагуу 4 шатны үнэлгээ явагдаж 4 аж ахуйн нэгж байгууллагын 540,0 сая.төгрөгийн зээл хүссэн төсөл тэнцсэн бөгөөд аймгийн Засаг даргын 2022 оны А/436 дугаар захирамжаар байгуулагдсан дэд хорооны ажлын хэсэг шалгарсан 4 төслийг хэлэлцэн үнэлгээ өгч, 4 шатлалын үнэлгээг нэгтгэн эрэмбэллээ.